كرونيك زوجي القاسي

خرج و خلاني نتلاوح في دموماتي لحظة لي عرفت بيها دخلت للجحيم ماشي قفص ذهبي ساعة قاعدة نستوعب اللي صرالي نضت بعدها مهدودة فشلانة خلاص ماش قادرة نتحرك رحت بسيف لدوش دخلت تحت ما سخون ماشي حاسة بيه قد ما نار قلبي شاعلة، حبيت نظف العفن هذا لي مس جسمي بعدها ما بارد نطفي نار لي فيا.

لبست جبة طويلة على الاقل مانيش حابة نشوف ليطراس لي خلاهملي الوحش هذا، لميت شعري و خرجت عينيا منفوخين شفت السرير الابيض لي ولا حمر زادو دموعي ينزلو رحت خملت هذاك الهم و غسلت الدرا هاديك و هبطت خايفة منو منيش حابة نشوفو، روحي عايفتها، هبطت كانت دار كبيرة لتحت كوزينة و صالون و توالات و دوش

و لفوق شنابر و كل شونمبرا فيها دوش و توالات شفت مكاشو فدار تهنيت كانت 10 تع صبح دخلت للكوزينة شفت الفريجيدار فيه كل خير رحت شمرت على يديا درت شربة ماسيدوان و مثوم و ڤغاتان قلت معليش لازم واجباتي كزوجة خايفة كاش ميديرلي كثر، كملت على 12 طيابي نسنا يجي مجاش لحقت الوحدة اذن ظهر صليت و دعيت ربي يفرج همي، و كي لحقت الزوج و كان مازال ماجاش عرفتها مراحش يجي اصلا رحت فطرت و خبيت اللي بقا.